CEBU CITY – Naglaum si Senate President Vicente Sotto III nga mahimong independent, transparent, ug sinsero ang pagdumala sa Senado ilabi na sa mga makasulod sa giilang “Magic 12”.
Sa eksklusibong pagpakighinabi sa Bombo Radyo kang Sotto, kini nagkakanayon nga magpabilin ang leadership sa Senado bisan pa man nga makasulod sa Top 12 ang mga kaalyado ni Presidente Rodrigo Duterte.
Nagtuo gihapon ang Senate president nga credible ang resulta sa piniliay ilabi na nga nagpadayon ang inihapay sa mga boto gikan sa National Board of Canvassers (NBOC).
Samtang, miingon si Sotto nga kinahanglan pa nilang himoon og pamaagi aron mapakgang na ang giingong massive vote buying and selling sa nasud. Kini pinaagi sa pagpahigayon og Senate inquiry.
Dugang pa ni Sotto nga imbestigahan usab sa maong Senate inquiry ang mga nasinating aberya sa nakalabay nga 2019 elections sama lang sa nag-malfunction nga vote counting machines (VCM) ug corrupted nga SD (secure digital) cards.
