Nipasalig si Senador Joel Villanueva sa mga miyembro sa Jesus is Lord Church nga motambong siya sa bisan unsang special session sa Kongreso kung kini ipatawag atol sa legislative break.
Sa usa ka video message nga gipakita atol sa worship service sa simbahan niadtong Domingo, si Villanueva miingon nga andam siya nga motuman sa iyang mga katungdanan isip usa ka magbabalaod kung adunay special session.
Diin sa iyang pakigpulong, ang senador miingon nga daw naipit siya sa tunga-tunga tali sa duha ka nagkasumpaki nga paksyon.
Si Villanueva kabahin sa paksyon ni Senador Alan Peter Cayetano nga wala motambong sa katapusang tulo ka adlaw sa sesyon sa Senado sa wala pa ang sine die adjournment.
Kini nakapahinay sa pagpasar sa daghang mga balaodnon ug sa pagkumpirmar sa mga promosyon sa daghang mga opisyal sa militar.
Bisan pa niini, ang Senado nakahimo sa pagporma og 12 ka miyembro nga quorum ug napili si Senador Sherwin Gatchalian isip Senate president pro tempore ug Acting Senate President. Kini nakapukaw usab og mga panawagan alang sa usa ka espesyal nga sesyon aron hisgutan ang mga pending nga butang sa lehislatura.
Mahinumduman nga ang Malacañang kaniadto miingon nga si Presidente Ferdinand Marcos Jr. abli sa posibilidad sa pagtawag og special session aron mapasar ang mga gikinahanglan nga balaodnon samtang ang Senado anaa sa recess.
