CEBU — Mag-atubang og kasong rape ang upat ka mga menor-de-edad human gituohang ni-gang rape sa usa ka babaye sa Brgy. Pandan, dakbayan sa Bogo, Cebu.
Giila ang 21-anyos nga biktimang si Paquita, dili tinuod nga pangalan, samtang naglangkub sa edad nga 12 ngadto sa 17 anyos ang giingong mga nanglugos niini.
Base sa imbestigasyon sa Bogo Police Station, mopalit unta og load si “Paquita” sa tindahan apan gibira kini dayon sa mga suspek.
Gituohang gipulipulihan og lugos sa mga suspek si “Paquita” sa may awa-aw nga dapit unahan sa ilahang panimalay.
Matud ni Police Staff Sergeant Meluna Mancing sa Women’s Desk nga nakahigayon og sumbong si “Paquita” sa buhatan sa kapulisan kuyog ang iyang lolo ug lola.
Dugang pa niini nga nakita sa medical examination nga nahilabtan gayud ang biktima sa mga menor-de-edad.
Nasikop dayon ang gituohang mga rapist human mipahigayon og hot pursuit operation.
Anaa na sa kustodiya sa DSWD ang upat ka mga suspek samtang anaa sa luwas nga kahimtang si “Paquita.”
