CEBU CITY — Gihulagway sa usa ka sports analyst nga mahimong exciting ug interesting ang mahitabong sangka nilang Manny Pacquiao ug Keith Thurman karong Hulyo 21 sa buntag, oras sa Pilipinas.
Matud ni Edmund Navarro nga nindot ang pagahimoong sangka ilabi na nga taas ang lat-ang sa ilang mga edad diin 40-anyos na si Pacman samtang 30-anyos usab si Thurman.
Nakita usab ni Navarro nga bisan pa man og agresibo si Thurman sulod sa ring, adunay weakness ang American boxer diin bakante ang pag-atake niini sa kaatbang.
Matud pa sa maong sports analyst nga makahatag og pinasahi nga kalingawan ang matag sumbag sa giilang “Pambansang Kamao” nga si Pacquiao alang sa boxing fans, bisan pa man og nagkataas ang edad niini.
Gibutyag usab ni Navarro nga kung dili moresulta sa pagdinaganay ang sangka sa duha, adunay mahitabong knockout.
Mahitabo lang kini kung magpabilin ang performance ni Thurman sa boxing ring.
