CEBU CITY-Suplay sa tubig sa Metropolitan Cebu Water District (MCWD) nagkuwang gumikan sa extended nga epekto sa El Niño phenomenon .
Kini ang gikompirmar sa tigpamaba sa MCWD nga si Charmaine Rodriguez Cara.
Nabantayan niini nga nagnihit gihapon ang suplay sa tubig gumikan kay nasinati sa mga tinubdan sa tubig ang extended nga epekto sa El Niño phenomenon.
Nasayran nga sa nakalabay nga mga buwan, nasinati sa mga konsumidor ang grabeng kainit sa panahon bisan pa man og adunay mga pagpang-uwan niadtong Hulyo.
Dugang pa ni Cara nga wala gihapon ma-replenish ang mga tinubdan sa tubig gumikan sa kakuwang sa mga pagpang-uwan.
Gi-atubang hinuon sa MCWD ang mga hagit diin maapektaran ang suplay sa tubig sama na lang sa kadaghan sa mga konsumidor ug establisimento, ug ingon man ang pag-shutdown sa usa sa ilang mga pribadong supplier sa tubig gumikan kay nasagulan man kini og tubig sa dagat.
Mipadayag si Cara nga gipaningkamotan sa MCWD ang pagpangita og mga long-term solution aron maibanan ang kanihit sa suplay sa tubig.
