CEBU CITY — Nagpabilin ang baruganan sa Sugbuanong manlalaban ug lider sa Task Force Haring Tupas nga mokanaog na lang sa katungdanan ug kasuhan si PNP Chief Gen. Oscar Albayalde.
Sa pagpakighinabi sa Bombo Radyo kang Atty. Clarence Paul Oaminal, kini nagkanayon nga wala gisunod ni Albayalde ang slogan sa PNP nga mao ang “honor, service, and justice.”
Pasabot pa sa manlalaban, nga simbolo ang mo-retiro nga PNP Chief sa dishonor, kakuwang sa serbisyo, ug walay hustisya.
Dugang pa ni Oaminal, nga maglisod ang mga sakop sa kapulisan sa ilang responsibilidad kung wala mosubay ang lider sa ilang gipanumpaan.
Kinahanglan usab, matud pa, nga patas-an pa ang standards niini isip PNP chief aron makasita sa mga badlungong sakop sa kapulisan.
Samtang gibarugan sa Police Regional Office-7 nga wala matandog ang mga sakop sa kapulisan subay sa isyu ni Albayalde kalabot na sa giingong pagkalambigit sa “narco cops.”
‘MAAYONG LIDERATO’
Gihimug-atan ni Dr. Ryan Maboloc, propesor gikan sa Ateneo de Davao University, nga apektado ang liderato sa PNP chief kung malambigit kini o ang iyang mga sakop sa korapsyon ug uban pang mga ilegalidad.
Alang sa political analyst, angayang barugan sa hepe ang pagkamaayo nga ehemplo ngadto sa mga sakop sa kapulisan sa nasud. Kini aron makab-ot ang gitinguha nga good governance.
Gitambagan ni Maboloc si PNP Chief Albayalde nga mas maayong mo-produce og lig-on nga ebidensya aron madepensahan ang giingonmg pagkalambigit sa ninja cops.
GIYA SA KAHITAS-AN
Gitambagan usab ni Atty. Oaminal ang mga otoridad nga mag-ampo samtang nakigbisog sa seryoso nga kampanya batok sa ginadiling drugas.
Kini subay na giingong padayong paghitak sa ginadiling drugas sa Sugbo ug tibuok nasud.
Nabantayan ni Oaminal, kinsang kanhi undersecretary sa Dangerous Drugs Board, nga usahay dili seryosohon sa mga nagbantay sa pantalan ug kapulisan ang pagbabag sa ilegal nga drugas aron dili makasulod sa isla.
Matud sa maong manlalaban nga kinahanglang mangayo og giya sa kahitas-an alang sa gi-atubang nga responsibilidad batok sa ilegal nga drugas.
Gihimug-atan ni Oaminal nga dili makasulod ang drugas sa nasud kung dili itugot sa mga opisyal ang pagsulod niini. (GN)
