PATAY ang usa ka lalaki samtang anaa sa kritikal nga kahimtang ang kauban human gidunggab atol sa kapistahan sa Brgy. Cambagte, sa lungsod sa Ginatilan, Cebu.
Giila ang mga biktima nga silang McRons Cayacap, 23 anyos, usa ka nautical graduate; ug Michael Ferrer, 18 anyos.
Samtang ang suspek mao si Orlando Opon, 35 anyos, ug residente sa Brgy. Cagsing, sa susama nga lungsod.
Matud ni Police Chief Master Sergeant Irving Avila sa Ginatilan Police Station nga nanuroy ang duha ka mga biktima sa diskohan atol sa kapyestahan sa maong barangay.
Sa susamang, giyayungan ni Opon ang kauban niini diin pulos na silang nakainom. Nasayran nga giingong nangatawa ang mga biktima sa dihang ilang nahinagbo si Opon.
Gumikan sa tumang kalagot ni Opon nga dala sa iyang pagkahubog, nagkuha kini og kutsilyo dayon og dunggab ngadto sa mga biktima.
Naigo si Cayacap sa ubos nga bahin sa iyang ilok samtang adunay samad si Ferrer sa iyang tiyan.
Dead on arrival si Cayacap samtang kritikal ang kahimtang ni Ferrer human gidala sa tambalanan.
Natanggong ang suspek sa prisuhan ug mag-atubang kini og kasong murder ug frustrated murder.
