CEBU CITY-Giawhag ni Fr. Robert Reyes kinsang naila nga usa ka ‘running priest’ si Cebu Archbishop Jose Palma nga ipanawagan niini atol sa iyang misa nga magpahigayon og martsa ang katawhan subay na usab sa pagpamutol og kahoy sa dakbayan sa Sugbo.
Kini subay na usab sa paghatag ug permit sa Department of Environment and Natural Resources (DENR) ngadto sa Department of Public Works and Highways (DPWH) nga mamutol sa mga dagkong kahoy.
Matud ni Fr. Reyes, nga ang kahoy dili makatingog ug kini putlon gumikan kay wa man kini baba hayan, gikinahanglan nga ‘kita’ nga adunay mga baba ang maoy mutingog sanglit ang pagpamutol sa kahoy usa ka krimen batok sa kalikupan.
Sigon pa nga gamay nalang kaayo ang mga kahoy sa dakbayan gumikan sa sige ug pamutol. Dili kinahanglan nga magpabiktima sa mga pulitiko ug mga negosyante sa ilang mga gipangbuhat susama sa dakbayan sa Naga nga ang mayor nalang ang nabuhi tungod kay ang mga kahoy gihinay-hinay na og patay ingon man ang mga katawhan.
Subay na usab sa rason nga gikinahanglan putlon ang kahoy nga anaa daplin sa kasada gumikan kay duol kini sa disgrasya sa mga motorista, gihimug-atan sa pari nga dili ang mga kahoy ang angay pasanginlan niini, inay ang mga driver nga pataka lang ug padagan.
Mensahe pa sa pari nga imbis pamutlon ang mga kahoy,mangita na lang og nindot nga pamaagi gumikan kay ang pagputol niini susama ra usab nga gipatay ang katawhan.(Bombo Lahvi Quiñones)
