Gilunsad gahapong adlawa, Mayo 8, ang ‘Dapat Isa Lang (D1L) Movement,’ usa ka nasudnong kampanya sa mga grassroots nga nagtumong sa pagpasar sa usa ka ‘tinuod’ nga balaodnon batok sa political dynasty pinaagi sa people’s initiative.
Pipila sa mga prominenteng miyembro sa kalihukan naglakip ni kanhi Supreme Court Justice Antonio Carpio, Fr. Robert Reyes, Atty. Carlo Africa, ug uban pa.
Gusto sa D1L Movement nga limitahan ang mga pamilyang politikal sa usa lang ka lingkuranan sa nasudnong lebel (Presidente, Bise Presidente, Senado, House of Representatives, Party-list).
Gusto usab sa grupo nga ang mga pamilyang politikal makakuha lang og usa ka lingkuranan sa lebel sa probinsya (Gobernador, Mayor, Bise Mayor, Konsehal, Barangay Kapitan ug Kagawad) hangtod sa ika-4 nga Civil Degree of Consanguinity and Affinity.
Ubos sa people’s initiative, 10% o 6.9-milyon nga pirma sa mga rehistradong botante sa tibuok nasud ang kinahanglan kolektahon.Kini katumbas sa 3% sa 254 ka distrito sa Pilipinas.
Kung makab-ot na kini, ang petisyon ipasaka sa Commission on Elections (COMELEC) ug usa ka referendum ang ipahigayon diin ang publiko mobotar og ‘OO’ o ‘DILI’.
Niining paagiha, ang balaod dili na kinahanglan nga moagi sa Kongreso o sa Presidente sumala sa Artikulo VI, Seksyon 32 sa 1987 Konstitusyon..
