Gi-lugwayan sa Commission on Elections (COMELEC) ang oras sa botaray sa pipila ka lugar sa rehiyon sa Bangsamoro tungod sa mga insidente nga nakapa-delay sa pag-abli sa pipila ka mga polling precinct.
Sama nalang sa nadiskubrihan sa Maluso, Basilan, diin nakadiskubre ang COMELEC og mga balota nga daan nang nabulitan kon pre-shaded nga gitakdang i-apod-apod sa 36 polling precinct gikan sa 68 ka mga polling precinct.
Tungod niini, posibleng molungtad hangtod karong adlawa, Setyembre 15, ang eleksyon sa pipila ka bahin sa Maluso.
Subay niini, nag-isyu og mando ang komisyon alang sa pag-imprinta pag-usab sa mga balota sa National Printing Office, nga kinahanglang dad-on sa maong lugar una pa mahimong ipahigayon ang botaray.
Apan, taliwala sa nagkadaiyang mga insidente ug mga problema nga nasugatan, gihulagway ni COMELEC Chairman George Garcia ang nagpadayon nga BARMM Parliamentary Elections nga “generally peaceful.”
Apan, gikondena sa komisyon ang mga insidente sa kapintasan sa Cotabato City nga mikalas sa kinabuhi sa upat ka tawo ug nagbilin sa 15 ka laing auban pa nga naangol.
Kalabot niini, gipadayon sa COMELEC ang ilang target nga 80% nga voter turnout alang sa unang BARMM Parliamentary Elections. Matod ni Garcia, padayon nga nakita sa ahensya ang mga residente nga nanggawas sa ilang mga panimalay aron moapil ug mobotar sa eleksyon.
