MANDAUE CITY-Paghatag ug pagtagad sa nagkadaiyang sektor sa katilingban ang nag-unang tumong sa katukoran sa Kaabag Foundation sa dakbayan sa Mandaue.
Gi-asuy ni Kaabag Foundation President Editha Fanlo Cortes atol sa programang ‘Goodmorning Philippines (GMP)‘ sa Bombo Radyo Cebu, nga nagsugod ang ilahang organisasyon kaniadtu pang tuig 2007 kung diin gipasi-ugdahan kini ni Mandaue City Mayor Jonas Cortes apan nagpadayun bisan pa man sa higayun nga wala sa katungdanan ang nahisgutang mayor.
Matud ni Cortes nga gi-atiman nila ang panginahanglananon sa mga senior citizen, persons with disabilities (PWDs), kababayen-an, kabatan-onan, LGBT community, man-pride group, Urban Poor, ingun man ang housing group.
Matud pa nga sa matag sektor adunay nagkadaiyang panginahanglan hinungdan nga aduna usab silay gibutang nga mga ‘Kaabag adviser’. Gitataw usab ni Cortes nga sila ang naningkamot alang sa pondo sa organisasyon ug wala kini sila mag-depende sa tabang sa mayor.
Sigon pa nga makakuha sila ug pondo pinaagi sa ilahang mga ipahigayon nga ‘fund raising activities’ kung diin mupaingon usab sa ilahang mga ‘beneficiaries’. Usa sa gipondohan sa Kaabag mao ang “Hope of Mandaue Home Children Center (HOME)” kung diin usa kini ka institusyon alang sa mga Children In Conflict with the Law (CICL), abandon children, libud-suroy nga mga bata, ingun man ang mga bata nga biktima sa pagpangabuso.
Samtang, gidugang usab ni Cortes nga gawas sa HOME, aduna pa’y gitawag nila ug I-Kids o ang mag ‘indigent’ nga mga bata kung diin sa matag Disyembre o Christmas season, hatagan kini nila ug mga christmas gift, ingun man ang ilahang pagpahigayun ug mga feeding program.
Gipasigarbo ni Cortes nga ang tanang nalakip sa Kaabag Foundation ang pulos mga ‘volunteers’ ug adunay gugma sa dakbayan sa Mandaue hinungdan nga nasustinir gayud nila ang ilahang organisasyon. (SBR)
