CEBU CITY – Gi-uyonan sa pipila ka mga anaa sa akademya ang panawagan nga i-review sa Movie Television Review Classification Board (MTRCB) ang Spanish-produced animated film nga ‘Elcano and Magellan’.
Gibutyag ni Dr. Dan Salud, CIT-U professor, nga kinahanglan nga dili bias ug nahisunod sa kasaysayan sa Pilipinas ang maong salida ug dili sukwahi.
Matud ni Dr. Salud nga daku kini ug kausaban sa kasaysayan sa nasud ilabi na sa Sugbo kung diin gayud nagtagbo ang dalan ni Datu Lapu-Lapu ug Ferdinand Magellan.
Sugyot sa propesor nga ipasusi pagbalik ang maong salida una kini ipagawas sa Pilipinas sunod tuig ug lingkuran kini sa tanang hingtungdan lakip na ang mga anaa sa ‘academe’.
Gihimug-atan ni Salud nga mas maayo gayud nga ipabilin ang ‘Sucesos de las Islas Filipinas’ nga sinuwat sa usa ka spanish writer nga si Antonio de Morga, diin bisan pa man ug usa kini ka espanyol, giingung dili gayud bias ang mga nakalatid sa libro niini.
Nagkanayon kini nga ang maong libro ang dugay nang gisunod sa mga history subjects sa hisgutanan sa ‘Spanish colonization’ sa Pilipinas.
Kahinumdoman nga napuno sa pagsaway ang nahisgutang animated film human nga nahimong ‘kontrabida’ ang pinaka-unang bayani sa Pilipinas nga si Datu Lapu-Lapu, butang nga gi-almahan usab sa National Historical Commission of the Philippines.
