CEBU CITY-Paningkamotan sa Cebu Environmental Sanitation Enforcement Team (CESET) nga masunod ang bag-ong kamandoan ni Presidente Rodrigo Duterte sa pag ban sa mga e-cigarette o vape.
Kini ang gibutyag ni Grace Luardo ang head sa CESET. Isyuhan matud pa og citation ticket ang si kinsa man nga maaktohan nga migamit niini sa mga publikong lugar.
Susama sa multa sa pagpanigarilyo sa mga pampublikong lugar, mao usab ang citation ticket sa e-cigarette kung diin makamulta kini og P2,000.
Gihimug-atan ni Luardo nga kung dili makabayad sa multa nga P2,000, mapasakaan kini ug kaso ug makabayad na hinuon og P5,000. Dugang pa sa CESET head nga kasagaran sa ilang madakpan ang mga anaa duol sa skwelahan ug mga studyante.
Mapasalamaton hinoon si Luardo ngadto ni Cebu City Mayor Edgardo Labella sa pagsuporta sa maong kamanduan ilabi na sa environmental laws.
‘I- regulate? ‘
Suportado usab ni Cebu City Councilor Joel Garganera, ang pag-ban sa mga vape.
Matud ni Garganera nga muduso usab siya ug ordinansa sa konseho alang sa pag-regulate sa mga mugamit niining e-cigarette o vape ingon man sa mga namaligya niini sa dakbayan susama sa sigarilyo nga adunay mga ‘designated’ nga lugar kung asa manigarilyo.
Gumikan kini sigon pa ni Garganera nga ang vape dili iligal apan aduna kini isyu sa panglawas. Kinihanglang dili matud pa magkuwang ang gobyerno sa pagpahibaw sa katawhan nga makadaot kini sa panglawas. (Lahvi Quiñones)
