CEBU CITY – Paningkamotan sa Cebu City Government nga makasugod na sa pagtinda ang mga ‘displaced sidewalk vendors’ sa Night Market sugod karung Nobyembre 29 o 30.
Gibutyag ni Cebu City Mayor Edgardo Labella nga hatagan nila ug prayoridad ang kadtong mga sidewalk vendors nga na-dislocate gumikan sa road clearing operation.
Matud ni Mayor Labella nga kung aduna pa’y sobra nga luna hayan makatinda ang uban pang mga vendors nga gustong muladlad sa ilahang mga paninda.
Gisiguro sa mayor nga mahiluna ug tarong ang mga sidewalk vendors alang usab sa ilahang panginabuhi-an.
Samtang, gipahibalo ni Mayor Labella nga ugmang adlawa makigpulong kini sa tanang mga sidewalk vendors kauban ang DILG 7 arun nga mahatagan ug tubag ang gusto sa mga vendors nga gustong mubalik sa ilahang naandan nga pwesto sa dalan Colon.
