Rama wala’y plano nga mudagan pagka-Mayor sa 2022 election

CEBU CITY – Sukwahi sa mga nanggawas nga istorya, giwakli ni Cebu City Vice Mayor Michael Rama ang posibilidad nga mudagan kini isip mayor sa tuig 2022.

Matud sa bise mayor nga wala kini plano nga makigbangga kang Mayor Labella sa umaabot nga pinili-ay.

Gitataw ni Rama nga bisan pa man ug managlahi ang ilahang baruganan sa usa ka isyu giingong wala kini nagpasabot nga mag-atbang kini sila sa mayor.

Apan iyahang giklaro nga dili lang kini gusto nga hilabtan ang mga kabus ilabi na ang mga sidewalk vendors.

Nagkanayon si Vice Mayor Rama nga andam kining mudagan pagka-konsehal basta dili lang hilabtan ang mga kabus arun nga ipamatu-od niini nga wala kini mag-apas sa pagka-mayor.