Gipasabut sa Kagamhanan sa Dakbayan sa Sugbo, nga walay pagpanginlabot ang City Hall sa mga pagpahigayon sa rotational block outs, diin gipasabot ni Kenneth Siasar ang proseso sa pag-distribute sa kuryente, human nila makigtagbo sa Visayan Electric (VECO).
Giawhag usab sa Cebu City Government ang mga mall ug dagkong commercial ug industrial establishments sa dakbayan nga moapil sa Interruptible Load Program (ILP) ug mogamit sa ilang kaugalingong generator sets aron makatabang sa pagpakunhod sa karga sa Visayas Grid taliwala sa gipatuman nga rotational brownout.
Gipatin-aw sa kagamhanan sa dakbayan nga ang kakuwang sa power supply gikan sa mga independent power producers nga gipasa ngadto sa National Grid Corporation of the Philippines (NGCP) maoy nag-unang hinungdan sa rotational brownout nga nasinati sa Visayan Electric (VECO) ug sa mga konsumidor.
Sumala ni Kenneth Siasar, Chief of Staff sa Office of the City Mayor, gipatuman ang rotational brownout aron malikayan ang mas dakong peligro sa total blackout kon dili makontrol ang power demand.
Gipasabot ni Siasar nga gikan sa alas-1:00 hangtod alas-5:00 sa hapon, ang mga residential areas ang kasagarang maapektuhan aron mapadayon ang operasyon sa mga negosyo. Sa pikas bahin, gikan sa alas-6:00 hangtod alas-10:00 sa gabii, ang mga panimalay na usab ang hatagan og prayoridad sa kuryente tungod kay kini ang ilang peak consumption period.
Labot niini, gipatuman na sa Cebu City Government ang energy conservation measures sulod sa mga buhatan sa gobyerno, lakip ang paglimitar sa paggamit sa air-conditioning units, suga, ug elevators. Giawhag usab ang publiko nga mahimong responsable pinaagi sa pagpalong sa mga gamit sa kuryente nga wala gipahimudlan.
Isip subay sa mas detalyadong long-term measures, padayon usab ang pag-instalar og mga solar panels sa mga sakuhaan ug mga pampublikong pasilidad sa kagamhanan aron makadaginot sa enerhiya ug makatabang sa pagpakunhod sa carbon emissions.
