Mipasaka og kasong libel sa City Prosecutor’s Office si Cebu City Councilor Niña Mabatid batok sa duha ka mga sakop sa Barug-PDP-Laban nga silang Jun Alcover ug Ramil Ayuman.
Kini subay na sa nigawas nga taho diin, matud pa, mibutyag ang duha nga mihangyo si Mabatid sa usa sa mga giingong biktima nga ilibkas ang sexual harassment complaint batok ni Department of General Services Divsion Head Lorenzo Basamot.
Una nang gihimakak ni Mabatid ang pamasangil nilang Ayuman ug Alcover kalabot na sa giingong paghangyo sa usa sa mga biktima nga ilibkas sa maong kaso.
Matud ni Mabatid nga nagmalipayon nagmalinawon na kini sa iyang desisyon. Dugang pa niini nga naibanan ang iyang gibating kahasol sanglit igo lang kini nga mipadayag sa kamatuoran.
Samtang mibwelta si Mabatid ngadto ni Alcover ug nagkanayon kini nga nga naka-afford og bully ang kanhi-konsehal kaniya.
Bisan pa man og nasayud si Mabatid sa personality ni Alcover, andam niya kining atubangon tungod kay nahurot na ang iyang kahadlok.
‘Andam si Ayuman’
Andam nang atubangon sa kanhi kapitan sa Brgy. Apas nga si Ramil Ayuman ang kasong libel nga gipasaka ni Mabatid batok kaniya.
Matud ni Ayuman nga iyang gidawat ang hagit ni Mabatid kaniya inig dawat na sa kopya sa kasong libel.
Pamatud-an usab ni Ayuman nga walay malisya ang iyang rebelasyon mahitungod ni Mabatid.
Hugot niyang gibarugan ang maong akusasyon ug mihangyo kini ni Mabatid nga dili gayud ilihis ang isyu mahitungod sa sexual harassment case nga gi-atubang ni Basamot.
Gisaway usab ni Ayuman si Mabatid gumikan sa pagka-best actress ug pagkabakakon.
Hinuond wala usab kini nahulga ug dili siya angayang mahadlok sa maong kaso.
Samtang padayong gikab-ot sa Bombo News Team ang reaksyon ni kanhi konsehal Jun Alcover kalabot na sa kasong libel batok kaniya.
