CEBU CITY – Gitinguha karon ni Cebu City Councilor Eugenio Jun Gabuya nga matagaan ug pro-rated bonus ang mga empleyado nga nangataktak human nilingkod si Cebu City Mayor Edgardo Labella.
Kini ang mga trabahante sa panahon ni kanhi Cebu City Mayor Tommy Osmeña nga naka-serbisyo kutob lang niadtong Hunyo 30.
Ang lakang sa maong konsehal ang tubag niini sa mga empleyado nga na-terminate kinsang nagpatabang kaniya nga mahatagan sila ug pro-rated bonus.
Kini base na usab sa nakalatid sa balaod nga ang usa ka trabahante maka-serbisyo ug upat ka bulan sulod sa usa ka tuig mamahimo nga mahatagan ug pro-rated bonus.
Nasayran nga basi sa balaud, ang usa ka trabahante nga naka-serbisyo ug upat ka bulan sulod sa usa katuig ang makadawat ug pro-rated bonus.
Atol sa budget hearing, nahukman sa Program on Awards and Incentives for Service Excellence nga magpahigayon ug meeting karung adlaw nga Lunes arun nga hisgutan ang maong isyu kung angayan bang hatagan ang mga empleyado nga nangataktak human nilingkod si Labella.
Ang paghatag ug bonus sa Cebu City Government ngadto sa ilahang mga empleyado ang subay na sa daghang mga awards sa maayo nga serbisyo niadtong tuig 2018 sa panahon ni Tomas Osmeña hangtud na sa kasamtangan nga administrasyon ni Labella.
