Mibahad ang Cebu City Market Authority nga silotan ang mga lehitimong night market vendors kinsang giingong namaligya sa ilang pwesto.
Kini human nga nakadawat sila og mga reports kalabot na sa giingong pagpamaligya og stalls ngadto sa mga private vendors sa kantidad nga 15,000 pesos ngadto na sa 20,000 pesos.
Mas taas kini itandi sa abang nga 1,200 pesos matag buwan nga gikolekta sa City Government.
Matud sa City Market Administrator nga si Junil Matugina nga ilang imbestigaran ang maong modus subay na sa ilang pagkadismaya.
Gihimug-atan ni Matugina nga tuyong gitukod ang Colon Night Bazaar alang sa mga manindahay nga apektado sa sidewalk clearing operation sa gobyerno.
Kung mapamatud-an man sa City Market Authority ang nagpaluyo sa giingong pagpamaligya sa stalls, dili na tugutan ang lehitimong vendor nga makabaligya sa night market ug ihatag na lang sa lain ang luna.
Giawhag usab ni Maria Pino kinsa head sa Cebu City United Vendors Association (CCOVA) ang mga kauban nga giingong namalgya sa stalls niini moduol kaniya.
Kini aron maubanan niya ang maong concern ngadto ni Mayor Edgardo Labella.
Matod ni Pino, nakadungog siya ug storya kabahin niini apan wa pamay niduol niya bahin sa maong hitabo.
Gipasidan-an na usab ni Pino ang mga kauban niini nga ug kun di man gani sila maninda sa night market mamahimo nga kaliwat nila ang ilang patindahon ug depende na nila kun unsa silang pamaagi sa ginansya.
