Nanawagan si Andres Bayarcal kinsa head sa Cebu City Transportation Office (CCTO) ngadto sa katawhan nga dili nalang magdala ug sakyanan sa pagsimba sa Basilica Menore del Sto. Niño atol sa novena mass.
Kini subay na nga adunay daghang na-clamp nga mga sakyanan duol sa maong simbahan.
Matod pa ni Bayarcal nga ang vicinity sa Basilica para sa mga tao nga manimbahay ug dili para sa mga sakyanan.
Gumikan nga imbis moloag ang kadalanan, muhoot na hinuon gumikan makamugna man ug traffic.
Samtang matod pa ni Bayarcal nag-initiate ang Cebu City council nga adunay free ride nga ipahigayon para sa mga manimbahay.
Kung diin gihangyo niini ang bus sa SM seaside ug Robinson Galleria nga maoy makapasakay sa mga tao gikan sa nahisgutang mga mall paingon sa plaza independencia.
Nagsugod ang maong free ride niadtong pagsugod sa unang adlaw sa Nobenaryo.
Samtang sa adlaw nga Sabado petsa 18, magsugod na ang closure sa kadalanan sa rota sa procession.
Sa susamang adlaw, dili na usab pasudlan pa ang Cebu South Bus Terminal (CSBT) ug mga bus, ug adto nalang kini kutob sa South Road Property (SRP).
Sa adlaw nga dominggo, fiesta Señor, sayo usab mag-road closure gumikan sa daghan nga aktibidad niining adlawa. (Lahvi Quiñones)
