CEBU CITY – Nanawagan ang Cebu City Transportation Office (CCTO) sa mga manambong ug misa nobernaryo sa Basilica Minore del Sto. Niño nga dili na lang magdala ug sakyanan.
Gibutyag ni CCTO Head Andres Bayarcal nga mas mugrabi ang kahuot kung adunay mga sakyanan ug paglikay usab kini nga dili ma-clamp sa ilahang mga CCTO enforcers.
Kini ang hangyo ni Bayarcal subay sa daghang mga reklamo human nga gi-clamp ang ilahang mga sakyanan.
Gipasabot usab niini nga adunay daghang mga nagpabayad ug parking nga dili man mga tawo sa CCTO hinungdan nga daghan ang na-clamp gumikan kay wala man sa parking area ug nabati pa ang ilahang imahe.
Gihimug-atan niini nga wala gayud sila mangwarta ug igo lang nga nagtuman sa lagda, ingon man sa mando ni Cebu City Mayor Edgardo Labella subay na sa nagsingabot nga Sinulog Festival 2020.
Nagkanayon si Bayarcal nga gikinahanglan ang gamay nga sakripisyo kung ti-unay nga deboto gumikan kay giingong walay hayahay sa pagpaingon sa langit hinungdan nga kinahanglan nga dili na magdala ug sakyanan.
