Moabot na sa P1-million ang natalang danyos human miulbo ang dakong sunog kagabii sa Sitio Santo Niño 3, Brgy. Luz, sa dakbayan sa Sugbo.
Nakadawat og alarma ang kabumberuhan sa takna nga 8:13 kagabii ug giisa kini sa 4th alarm pagkalabay sa pipila ka minuto.
Napalong kini sa mga kabumberuhan gikan sa Cebu City Fire Department ug mga kasikbit nga fire stations pasado alas-11 na sa gabii.
Matud sa imbestigador nga si Senior Fire Officer 4 Oliver Tautho nga nagagikan ang dakong sunog sa panimalay nga gipanag-iya ni Mary Ann Lapiz.
Naugdaw ang dili moubos sa 60 ka mga panimalay sa maong residential area diin sagad niini hinimo sa light materials.
Giimbestigaran na karon sa mga kabumberuhan kung unsa man ang hinungdan sa dakong sunog.
Kasamtangang nag-evacuate ang mga nasunugan sa Abellana Gym sa nahisgutang barangay.
Pagkahuman sa maong trahedya, mibisita si Cebu City Mayor Edgardo Labella sa mga nasunugan alang sa pag-atiman niini ug paghatag og mga hinabang.
