CEBU CITY — Naugdaw ang usa ka ancestral house ning sayo sa buntag sa Sitio Ipil, Brgy. Basak San Nicolas, dakbayan sa Sugbo ning unang semana sa Fire Prevention Month.
Nakigbugno sa dakong ka’yo ang mga bumbero gikan sa Cebu City Fire Department ug mga kasikbit niining fire stations human nakadawat og alarma sa takna nga 1:37 sa kaadlawon.
Milanat ang maong sunog og kapin duha ka oras ug giisa kini ngadto sa third alarm.
Nagsugod ang dakong kayo gikan sa kwarto ni Jonathan Estrella.
Matud sa imbestigador nga si Senior Fire Officer 1 Marichel Caburnay nga nagpakisayud pa kung unsa man ang hinungdan sa dakong sunog nga miresulta sa pagkaugdaw sa gibana-banang anaa sa kapin 70 ka mga panimalay.
Anaa sa kapin P600,000 ang natalang kantidad sa danyos ug kasamtangang namakwit ang mga apektadong residente sa Alumnus Gymnasium.
