CEBU CITY — Mipadayag ang usa ka tindera og “tuslob buwa” sa Brgy. Suba, dakbayan sa Sugbo nga dili mahimong angkonon sa bisan kinsa o bisan unsang negosyo ang maong pagkaon.
Hugot nga gibarugan sa tindera nga si Ica Cañag nga sa Brgy. Suba orihinal nga nagagikan ang recipe sa maong pagkaon ug gipasa-pasa ang recipe niini sa managsunod nga henerasyon.
Kini ang nahimong reaksyon sa tuslob buwa vendor human miluwat og “friendly reminder” ang usa ka kan-anan sa Gorordo Avenue, sa susamang dakbayan diin na-register ang maong pagkaon isip trademark.
Pasabot niini, gi-angkon sa maong kan-anan ang pangalan nga “tuslob buwa” isip copyrighted trademark ug sila lang, matud pa, ang makagamit niini.
Mibwelta hinuon si Cañag nga wala nay kwenta ang iyang pagluto niini sulod sa kapin tulo ka dekada kung angkonon sa maong kan-anan ang tawag sa maong recipe.
Dugang pa sa tindera nga dako og tabang ang iyang negosyo gumikan kay nakahuman ang iyang anak sa kolehiyo tungod lang niini.
Mipadayag ang Intellectual Property Office of the Philippines (IPOPHIL) nga subayon nila ang registration sa maong kan-anan ug mipasalig nga posible nilang ikanselar ang registration kung wala kini misunod sa criteria.
Sa usa ka report, andam usab ang kapitan sa Brgy. Suba nga si Jojo Sable nga mohimo og legal nga lakang batok sa kan-anan nga nag-trademark sa termino nga tuslob buwa sanglit nagagikan diha ang maong pagkaon.
Ang “tuslob buwa” maoy usa sa mga inilang pagkaon sa Sugbo kung diin ituslob ang puso sa sauce nga adunay sagul nga utok ug atay sa baboy ug gitimplahan kini og mga seasonings. (Story by Gian Navarro)
