CEBU CITY- Gipahinumdoman sa Bureau of Fire Protection-Cebu City (BFP) ang publiko nga magmatngon sa paggamit sa kuryente ug mga kagamitan sa panimalay aron malikayan ang sunog, human nakatala og unom ka insidente sa nagkadaiyang bahin sa Sugbo sulod pa lamang sa unang mga adlaw sa Nobyembre.
Sumala kang SFO3 Wendell Villanueva, tigpamaba sa BFP-Cebu City, importante nga kanunay susihon ang mga kable sa kuryente, saksakan ug mga gamit sa panimalay aron malikayan ang mga depektong mahimong hinungdan sa sunog.
Giawhag usab niya ang publiko niining nagkaduol ang pasko nga susihon pag-ayo ang mga Christmas lights ug siguruhon nga adunay angay nga safety markings sa dili pa kini gamiton.
Gidugang ni Villanueva nga gawas sa tinuyo nga pagsunog, mahimo usab nga hinungdan sa sunog ang sobrang pagkarga sa mga saksakan, depektibo nga mga kagamitan ug mga problema sa electrical wiring.
Tungod niini, padayon nga gipakusog sa BFP ang ilang mga kampanya sa pagpahibalo aron mapalambo ang kahibalo sa publiko bahin sa hustong mga paagi sa paglikay sa sunog.
