Gibutyag ni Cebu City Mayor Nestor Archival, nga lig-on ang istruktura sa Cebu City Medical Center (CCMC), apan iyang giangkon nga ang mga kakulangan sa kuryente nga nakita sa mga volunteer engineers nagpabilin nga usa ka kabalaka.
Kini ang iyang giklaro, niadtong Lunes, Oktubre 12, 2026, human sa executive session sa Konseho sa Dakbayan niadtong Septyembre 29 diin ang mga volunteer engineers mipadayag sa ilang mga kabalaka bahin sa mga sistema sa kuryente sa tambalanan.
Pipila sa mga problema nga naglambigit; mao ang sa generator system, grounding, mga kable, bus duct, ug mga instalasyon nga wala nahiuyon sa mga espesipikasyon.
Iyang gipasabot nga ang ubang mga instalasyon dili husto nga pagkabutang o wala makatuman sa gikinahanglan nga mga espesipikasyon, ug midugang nga gusto sa Siyudad nga masiguro ang kaluwasan sa mga sistema sa ospital sa dili pa ipadayon ang nahabilin nga trabaho sa konstruksyon.
Gikuwestiyon ni Archival ang impresyon nga ang tibuok istruktura sa ospital dili luwas, nga iya usab gipanalipdan gumikan kay 10 years na kining nag-operate nga wala’y bati nga insidente nga nahitabo sa istruktura.
Gihimug-atan usab niini, nga kung dili luwas ang CCMC, dili na unta kini mamahimong ipadayon sa pagpatrabaho.
