Usa ka 2-anyos nga batang lalaki ang namatay human nakaangkon og daghang mga bun-og ug grabeng kadaot sa ulo sa Barangay Tisa, Cebu City, sayo sa buntag niadtong Miyerkules, Septiyembre 16.
Matod sa kapulisan, gibilin sa inahan ang bata ngadto sa iyang kapuyo nga nailhan nga si alyas Lyle, 37-anyos, samtang siya miadto sa trabaho ug gikataho nga mitext si Lyle sa inahan aron mangayo og pasaylo, hinungdan nga nagdali-dali kini og uli sa balay.
Pag-abot sa inahan, nakita niya ang bata nga wala nay panimuot ug gidala dayon kini sa Cebu City Medical Center, diin gideklarar sa mga doktor nga patay na ang bata pag-abot niini.
Nakurat ang inahan sa pagkakita sa daghang mga bun-og sa lawas sa bata ug nagduda nga gi-maltrato kini.
Ang death certificate nga gi-isyu sa doktor nagpakita nga ang hinungdan sa kamatayon mao ang “subdural hemorrhage ug blunt traumatic head injury”.
Hinuon, si Police Captain Meryl Causin, hepe sa Labangon Police Station 10, nag-ingon nga nagpaabot pa ang mga awtoridad sa resulta sa autopsy.
Dali usab nga nasikop sa mga sakop sa Cebu City Police Office ang suspitsado pasado alas 9:30 sa buntag sa Sitio Nazareth, Barangay Buhisan, ug mihimakak sa maong mga pasangil.
Ang suspek kasamtangang anaa sa kustodiya sa Labangon Police Station ug gikatakdang atubangon ang kasong murder, matod sa kapulisan.
