CEBU CITY- Pahugtan ni Cebu City Mayor Nestor Archival ang screening ug background checking sa mga aplikante ug job order (JO) workers sa city government human malambigit ang pipila ka trabahante sa City Hall sa pagpatay sa 24-anyos nga si Isaac Viernes.
Matud ni Archival, dili lamang drug testing ug police clearance ang angay susihon sa mga aplikante, kondili kinahanglan usab nga masusi pag-ayo ang ilang background ug mapamatud-an ang katinuod sa ilang mga dokumento.
Gipasabot sa mayor nga tagsa-tagsa ka opisina sa City Hall ang nagproseso sa daghang appointment sa mga JO ug casual employees, busa gikinahanglan nga palig-onon ang screening process.
Gilaoman nga mas estrikto na ang background checking sa sunod nga mga pag-renew sa kontrata sa mga personnel, ilabi na sa mga appointment nga molungtad hangtod Disyembre.
Samtang, padayon ang imbestigasyon sa Cebu City Police Office sa pagpatay kang Viernes, diin duha na ang giila nga principal suspects.
Base sa impormasyon nga nakuha, ang mga suspetsado mga JO workers sa city government nga nalambigit sa maintenance work sa usa ka opisina sa City Hall.
Dugang pa, nga dili suod nga kaila sa biktima ang mga suspetsado, samtang padayon pang gisusi sa kapulisan ang ubang sirkumstansiya nga nalambigit sa krimen.
Nagpadayon ang pagtipon sa mga ebidensiya aron masulbad ang kaso ug matino ang responsibilidad sa mga nalambigit.
Samtang, gitakdang ipahaya sa Lunes, Oktubre 26, 2026, ang biktimang si Viernes.
