Nakatala og dako nga pag-ubos sa ihap sa mga sunog sa Dakbayan sa Sugbo karong tuiga kumpara sa miaging tuig.
Sumala ni SFO3 Wendell Villanueva, ang spokesperson sa Cebu City Fire Station, miabot lamang sa 195 ka fire incidents ang nadawat sa ilang opisina gikan Enero hangtod Septyembre 2026.
Atol sa eksklusibong pakighinabi sa Bombo Radyo Cebu kaniya, iyang gikabutyag nga basi sa maong datos, kini nagpasabot nga mas mubo kumpara sa 277 ka insidente nga natala sa parehas nga panahon sa miaging tuig 2025.
Taliwala niining pagkunhod sa mga insidente, ang gibanabanang kantidad sa kadaot sa kabtangan miubos usab og dako.
Ang natala nga kadaot karong tuiga mikabat lamang sa P41 ka milyon, mas ubos kon itandi sa P117.8 ka milyon nga natala sa miaging tuig.
Gipahayag usab ni SFO3 Villanueva nga kining maayong resulta gikan sa mas gipalig-on nga kampanya sa Bureau of Fire Protection (BFP) ug sa padayong pagpakig-alayon sa mga sakop sa media, sama sa Bombo Radyo, nga nakatabang sa pagpakaylap sa impormasyon bahin sa fire safety ug awareness.
Diin, iyahang giasoy nga sa buwan sa Septiyembre, sukad Septiyembre 1 hangtod 13, aduna lamang lima ka insidente sa sunog ang nahitabo sa syudad ug ang gibantayang danyos wala pa moabot sa P300,000.
Subay niini, malaumon ang Cebu City Fire Station nga magpadayon kini nga dagan sa pagbalik sa mga selebrasyon sa Pasko pinaagi sa padayon nga kooperasyon sa tanan.
