Nagsang-at og duha ka balaodnon si Senador Panfilo “Ping” Lacson aron ipataas ang compulsory retirement age sa mga uniformed personnel sa Philippine National Police (PNP), Bureau of Jail Management and Penology (BJMP), ug Bureau of Fire Protection (BFP) gikan sa 56 ngadto sa 57 anyos.
Ubos sa Senate Bills 2395 ug 2396, si Lacson miingon nga ang tumong mao ang pagpreserbar sa kahibalo, kasinatian, ug liderato sa mga senior personnel sa mas taas nga panahon, samtang gihatagan usab sila og dugang panahon sa pagpasa sa ilang kahanas ngadto sa mga batan-ong opisyal.
Sa SB 2395, gisugyot ni Lacson ang pagpataas sa retirement age sa mga uniformed personnel sa PNP ngadto sa 57 aron mahatagan ang liderato og dugang panahon sa pagpatuman sa mga reporma sa institusyon ug pagpahimulos sa kasinatian sa mga personnel.
Samtang, sa SB 2396, ang retirement age sa mga uniformed personnel sa BJMP ug BFP ipataas ngadto sa 57.
Sumala ni Lacson, ang mga sugyot nahiuyon usab sa pagbag-o sa compulsory retirement age sa mga miyembro sa Armed Forces of the Philippines (AFP). Diin, base sa datos nga gikutlo ni Lacson, adunay gibana-bana nga 230,410 ka uniformed personnel sa PNP, 26,000 sa BJMP ug 41,286 sa BFP.
Sa sugyot para sa PNP, ang mga personnel nga wala pay usa ka tuig nga nagserbisyo human sa pagpasar sa balaod mahimo gihapon nga mopili nga moretiro sa edad nga 56, ug ang compulsory retirement age sa kasamtangang hepe sa PNP magpabilin sa 56 anyos.
Samtang alang sa pipila ka mga senior nga opisyal sa BJMP ug BFP nga adunay ranggo nga chief superintendent, director o deputy director general, mahimo silang magpabilin sa serbisyo sulod sa usa ka tuig, apan dili na mapalapad o patas-on pa.
