Naugdaw ang 18 ka panimalay sa sunog nga miulbo kagahapon adlawa, Biyernes, Setyembre 2, sa Sitio Sambag 1, Barangay Basak San Nicolas, Cebu City, nga nakaapekto sa 135 ka mga residente.
Sa pasiunang assessment sa Department of Social Welfare and Services, 35 ka mga pamilya ang nalakip sa mga nawad-an og pinuy-anan, lakip na ang walo ka “sharers” (nakig-ipon sa tag-iya), siyam ka mga nangabang, 14 ka mga lodger, ug usa ka tag-iya nga nagpuyo mismo sa balay.
Daling gipabakwit ang mga apektadong residente ngadto sa Fort Land gym, diin ang kagamhanan sa siyudad naghatag og mga pasiunang tabang samtang, gisugdan sa mga awtoridad ang pagparehistro ug pag-validate sa mga biktima sa sunog.
Girekomendar sa DSWS nga ang mga pamilya ug indibidwal nga nawad-an og pinuy-anan makadawat og tabang gikan sa disaster fund sa siyudad, lakip na ang relief goods, mga materyales sa pagtukod og balay, bugas, ug uban pang mga batakang panginahanglan.
Nadawat ang maong report kagahapon, pasado alas 11 sa buntag og giisa dayun kini sa first alarm, apan dali ra kining nakontrolar ug gideklarang fire-out pasado 12:23 sa udto.
Gibutyag usab ni Cebu City Mayor Nestor Archival, nga susataon una sa kagamhanan kung pribado ba ang luna nga nasunogan, aron makasusi sila asa pwede temporaryong makabalhin ang mga apektadong residente.
Base sa natala sa Bureau of Fire Protection (BFP) moabot sa 400 square meters, ang istruktura nga nangadaot nga gibana-bana nga mokabat sa sa P152,000 ang kantidad sa kadaot sa kabtangan.
Hinoun, walay natala nga namatay o naangol sa maong insidente.
Sa pagsuwat niining balita, wala pa makapagawas ang mga awtoridad og konklusyon bahin sa hinungdan sa sunog.
