Gipasabot sa Bureau of Fire Protection (BFP) nga panahon sa firefighting operation, ilang prayoridad ang pagpugong sa pagkuyanap sa sunog ngadto sa mga kasikbit nga balay ug establisyemento nga posibleng masalbar pa.
Sa pakighinabi sa Bombo Radyo Cebu, si SFO3 Wendell Villanueva, Spokesperson in Cebu City Fire Office, miingon nga kon adunay bahin nga dili na gyud matabang tungod sa kakusog sa kalayo, ilang i-adopt ang “exposure coverage” aron mapanalipdan ang mga silingang kabtangan nga wala pa malamoy sa sunog.
Matud ni Villanueva, ilabi na kon lisod ang sitwasyon ug walay kasayuran ang ubang residente nga posibleng maapektuhan sa sunog, ilang paningkamotan nga masalbar ang mga kasikbit nga panimalay samtang nagpadayon ang firefighting operation.
Giila usab niya nga dili malikayan ang mga reklamo ug kasuko gikan sa mga biktima tungod sa grabeng kahimtang nga ilang nasinati.
Matud pa niya walay biktima sa sunog nga malipayon, kasagaran ana puno sa kasuko ug kasakit tungod sa ilang nahanaw nga mga kabtangan.
Bisan pa niini, giingon ni Villanueva nga kinahanglan nilang buhaton ang ilang trabaho ilabi na kon adunay posibilidad nga aduna pa’y masalbar nga kabtangan.
Sa laing bahin, gibutyag usab niya nga adunay mga aktibong fire hydrants sa Cebu City bisan pa man nga adunay ubang lugar nga medyo layo sa fire scene.
Matud niya, adunay koordinasyon ang BFP ug ang Metropolitan Cebu Water District aron kon adunay alarma sa sunog, mapadako dayon ang water pressure ngadto sa pinakaduol nga fire hydrants sa lugar nga nasunogan.
Busa, padayon usab ang panawagan sa BFP ngadto sa publiko nga magtinabangay sa pagkonserba sa tubig ug enerhiya aron malikayan ang kakulang sa suplay ilabi na panahon sa dagkong sunog.
