Miulbo ang usa ka dakong sunog sa Sitio Proper, Brgy. Ermita, Cebu City, kagabii, Abril 4, 2026, nga nisanap sa daghang kabalayan ug nabilin ang kapin sa usa ka gatos ka indibidwal nga walay puy-anan.
Nadawat sa San Nicolas Fire Substation ang alarma sa may alas 7:32 sa gabii, ug tungod sa kaspas sa dilaab, gideklarar kini nga Third Alarm pag-abot sa alas 7:55 sa gabii. Bisan pa man sa kahuot sa agianan, paspas nga nakaresponde ang mga bombero human madawat ang tawag.
Naugdaw ang gibana-banang 27 ka mga balay sa dapit nga gipanag-iya ni Marina Palermo Milagrosa ug gipuy-an ni Christine Mae Palermo Milagrosa.
Diin, mokabat usab ngadto sa 40 ka pamilya o 160 ka indibidwal ang naapektuhan sa maong trahedya nga nikaon sa luna nga may gidak-on nga 1,560 square meters.
Ubos sa pagdumala ni SFO1 Derek B. Cordova, nagtinabangay ang 12 ka BFP fire trucks, usa ka ambulansya, ug 15 ka auxiliary teams aron mabatukan ang kalayo.
Nakontrolar ang kayo sa alas 9:47 sa gabii ug hingpit nga gideklarar nga fire out pag-abot sa alas 10:26 sa gabii.
Basi sa imbestigasyon, maayo na lang kay walay natala nga naangol o namatay sa maong insidente. Sa pagkakaron, padayon pa ang imbestigasyon ni FO2 Freddie Pasaol aron masuta kon unsay tinuod nga hinungdan sa sunog.
Apan gawas sa Barangay Ermita, adunay laing sunog usab nga nitumaw sa Sugbo gahapon gihapong adlawa, didto sa Barangay Zapatera, gisundan sa Barangay Lahug pasado alas 6:00 sa gabii.
Subay niini, mipadangat og pamahayag si SFO3 Wendell Villanueva, ang Information Officer sa Cebu City Fire Office, diin siya mibutyag nga bisan paman sa ubay-ubay na nga sunog ang narekord karon sa mga kabomberohan, ingun man dili pa usab dugay ang pag obserbar sa Fire Prevention Month, gitino gihapon niini nga adunay pagkunhod sa datos sa sunog nga mitumaw karong tuiga, kung ikompara sa milabayng tuig.
Dugang niya, sa tuig 2024-2025 aduna kapin 30 ka mga natalang sunog sa Sugbo diin gibana-banang aduna kini danyos nga 10 million estimated damage.
Apan karong tuiga, aduna lay natala nga 26 ka mga sunog hangtud sa kasamtangan, ug nitala kini og 8.7 estimated damage.
