CEBU CITY — Nimando karon si Lapu-Lapu City Mayor Junard “Ahong” Chan nga temporaryong pasirad-an ang pipila ka mga establisimento sugod karong Marso 23 isip kabahin sa mas gipahugot nga lakang batok sa COVID-19.
Sa iyang public address kagabii, mipahibalo si Chan nga sirad-an una ang mga internetan, mga salon, fitness gyms, pasugalan, spa, videokehan, dental clinics, lakip na ang mga malls.
Apan abli gihapon ang mga supermarkets, botika, kan-anan, medical clinics, money remittances centers, bangko, ug mga ahensya sa gobyerno sa sulod sa mall.
Isip pagsanong sa kamanduan ni Cebu Governor Gwendolyn Garcia, nimando si Chan nga dili na palaagon ang mga menor de edad, estudyante, ug mga edaran nga anaa sa 65 anyos pataas sulod sa 24 oras.
Apan mahimong makagawas ang mga mulupyo kung adunay palitunon, magpatambal, mo-escort sa masakiton, ug manarbaho basta adunay company ID.
Mitambag si Chan sa publiko nga magpabilin sa tagsa-tagsa ka mga panimalay aron maluwas sa makamatay sakit.
Hangyo karon sa mayor sa mga Oponganon nga magtinabangay og mosanong sa mga lakang subay na sa gi-atubang nga krisis tungod sa coronavirus disease.
