CEBU CITY — Gikondenar sa Department of Health (DOH)-7 ang binuhatan sa usa ka netizen kinsang nagpakatap og dili beripikadong impormasyon sa social media kalabot na sa giingong nagpositibo sa social media.
Kini human nga nagkaguliyang ang publiko human ni-post ang usa ka Rommel Rosito sa social media kalabot na sa giingong positive cases sa COVID-19.
Sa usa ka statement, nagkanayon si DOH-7 Regional Director Dr. Jaime Bernadas nga mopasaka sila og kasong kalapasan sa Mandatory Reporting of Notifiable Diseases and Health Events of Public Health Concern Act, Data Privacy Law, the Bayanihan To Heal as One Act, ug Cybercrime Prevention Act batok ni Rosito.
Mitambag karon ang DOH-7 sa publiko nga magpabiling responsable sa mga nakita ug na-share nga kasayuran kalabot na sa coronavirus sa social media.
Paninguhaon karon sa maong ahensya, ingon man ang Vicente Sotto Memorial Medical Center nga ilang paspasan ang paghatag og impormasyon ngadto sa publiko taliwa sa gi-atubang nga krisis nga dala sa COVID-19.
