CEBU CITY — Gibutyag sa kapitan sa Brgy. Guadalupe nga ang kakuwang sa manpower maoy hinungdan kung nganong wala gipaagi sa house-to-house ang pagpadala og hinabang nga bugas ngadto sa mga residente.
Kini human nga halos nagkagubot na ang palibut sa barangay hall human atol sa pagpang-apudapud og hinabang nga tag-lima ka kilo nga bugas ug uban pang hinabang sa matag balay.
Matud ni Kap. Michael Gacasan nga dili nila magamit ang mga barangay health workers kay nagbantay sila sa mga persons under monitoring o PUMs sa ilaha.
Dugang pa niini nga tungod sa panic sa mga tawo, wala hinuon masunod ang kamanduan nga by-sitio ang pagpanghatag sa maong hinabang ug wala napatuman ang physical distancing.
Mipasalig si Gacasan nga dili na mausab ang maong kagubot tungod kay sila na lang mismo ang sunod nga motunol sa hinabang ngadto sa mga residente nunot na sa pagpatuman sa enhanced community quarantine.
