CEBU CITY — Gikondenar sa Department of Health (DOH) ang mga nadawat nga report kalabot na sa pagpangharass ug pagsaway batok sa mga healthcare workers kinsang naningkamot aron makontrolar ang coronavirus disease.
Kini sama lang sa nahitabo sa usa ka nars sa Mindanao kinsang giyab-an og bleach human nasaypan isip suspected COVID-19 patient.
Ug susama usab ang nahitabo sa usa ka lalaking nurse sa Cebu City human giyab-an og chlorine sa dalan Tres de Abril niadtong Marso 27 sa gabii.
Mihangyo si DOH Undersecretary Maria Rosario Vergeire nga tahuron ang mga healthcare workers sanglit gibuhis ang ilang kinabuhi aron alagaran ang mga Pilipino nunot sa gi-atubang nga dakong hagit sa panglawas.
Matud usab niini nga angayang ihunong ang tanang matang sa diskriminasyon batok sa mga medical frontliners tungod kay sila gayud ang dangpanan kung masakit man.
Anaa sa 12 ka mga doktor ang namatay subay na sa gi-atubang giyera batok sa COVID-19.
Lakip niini mao ang usa ka pathologist sa Vicente Sotto Memorial Medical Center nga si Dr. Helen Tudtud, kinsang namatay sa maong sakit niadtong Marso 27.
