CEBU – Nitaliwan na ang oncologist nga lakip sa mga Cebuano frontliners sa Coronavirus Disease 2019 (COVID-19).
Sa facebook post sa anak nga si Dennis Thomas Tudtud karong adlawa, gikumpirmar niini ang pagtaliwan sa iyang amahan nga si Dr. Dennis Ramon Tudtud usa ka iladong oncologist, pipila ka adlaw human nipanaw ang inahan usab niini nga si Dr. Helen Tutud, pathologist sa Vicente Sotto Memorial Medical Center.
Gihulagway sa anak nga usa ka passionate ang amahan niini diin kanunay nga unahon ang iyang mga pasyente. Kahinumduman nga petsa 27 niining nga bulan, namatay si Dr Helen Tudtud nga giingong usa sa mga COVID-19 fatality sa dakbayan sa Sugbo og nagsilbi usab nga frontliner sa COVID-19 crisis.
Subay niini, sobra nga gikasubo sa pamilya ingon man sa mga Sugbu-anon nga giserbisyuhan sa mga naasoy’ng doctor, ang maong panghitabo.
Samtang base sa na-unang post ni Dennis Thomas, gibutyag niini nga wala sila kahibalo pa-unsa nakuha sa ilang mga ginikanan ang COVID-19 sanglit wala kini nibiyahe sa laing nasod.
