Ibalik na ni Pope Leo XIV ang sweldo sa mga kardinal ug mga senior official sa Vatican sa pre-Covid nga lebel, human giabrogar ang pay cuts nga gipatuman sa iyang gisundan nga si Pope Francis sa panahon sa pandemya, sumala sa nga gipagawas nga mando niadtong Lunes.
Niadtong 2021, gipakunhod ni Papa Francisco ang sweldo sa mga kardinal og 10 porsyento ug sa mga senior nga opisyal og 8 porsyento aron mamenosan ang palas-anon sa panalapi sa Holy See taliwala sa krisis sa COVID-19 ug sa padayon nga kakulang sa pondo.
Sa usa ka mando sa Papa nga gipagawas niadtong Lunes, nga natunong usab sa iyang ika-71 nga adlawng natawhan, gipahibalo sa Santo Papa nga ang maong lakang opisyal nga tangtangon sugod sa Septiyembre 1, 2026.
Matod niya, ang pagkunhod sa sweldo, nga kaniadto gikinahanglan aron matubag ang dagkong mga hagit sa pandemya, mahimo na karong bawion, bisan pa man nga gipasalig niya nga ang mga institusyon sa Vatican magpadayon sa pagpaningkamot alang sa economic sustainability.
Ang usa ka kardinal nga nagtrabaho sa Roman Curia, ang sentral nga administrasyon sa Simbahang Katoliko, gibanabana nga makadawat og kantidad nga tali sa 4,500 ug 5,000 ka euro matag bulan.
Nagpakita na og pag-uswag ang kahimtang sa panalapi sa Holy See; ang tinuig nga taho sa bangko sa Vatican nga gipagawas niadtong Mayo nagpakita og net nga kita nga 51 ka milyon ka euro.
Sa laing direktiba nga gipagawas niadtong Lunes, gikansela usab ni Leo ang plano sa miaging Santo Papa nga ibalhin ang pipila ka mga Vatican archival documents ngadto sa gawas sa maong gamay nga city-state, ug gipahibalo hinuon nga tukoron ang usa ka bag-ong pasilidad sulod mismo sa Vatican.
