CEBU CITY — Nagpabilin gihapon sa walo ang namatay sa coronavirus disease o COVID-19 sa Central Visayas sulod na sa usa ka semana.
Sa latest report gikan sa Department of Health (DOH)-7, anaa gihapon sa 38 ang confirmed cases sa coronavirus sa rehiyon.
Nag-una gihapon ang dakbayan sa Sugbo nga adunay 25 ka confirmed cases, samtang tulo sa Lapu-Lapu, ug duha sa Mandaue.
Nagpabilin sa tulo ang confirmed cases sa lalawigan sa Sugbo, upat sa Negros Oriental, ug usa sa Bohol.
Anaa na karon sa 22 ka mga pasyente ang naayo ug gideklarar nga “laboratory negative” human nga nagnegatibo sa sakit ang usa ka pasyente.
Kini mao si Patient CV-05, usa ka 53 anyos nga babaye ug nagpuyo sa dakbayan sa Sugbo.
Mipahinumdom si DOH-7 Director Dr. Jaime Bernadas sa publiko nga mosunod gayud sa mga containment measures aron mapugngan pa ang pagkatap sa makamatay nga virus.
