CEBU CITY – Gisiguro ni Cebu City Mayor Labella nga dili biyaan ang Sitio Zapatera, Barangay Luz, kansang iyahang gipaubos sa lockdown human nga aduna na’y 21 nga nagpositibo sa coronavirus disease 2019.
Sa pakighinabi sa Bombo Radyo Cebu kang Mayor Labella, giingong nasayod kini nga adunay daghang kabus sa nahisgutang dapit hinungdan nga iyaha kining gipadalhan ug dugang 160 ka mga sako nga bugas, ingon man mga disinfectants.
Giangkon sa mayor nga hilabihan ang iyahang kaguol sa maong lugar gumikan kay nagdikit ang mga panimalay ug daghan ang mga anaa sa ubos ang kahimtang.
Subay niini, gitataw ni Labella nga samtang anaa sa lockdown ang nahisgutang lugar, hatagan gayud kini ug ayuda sa City Hall diin sa pagbana-bana niini, ang 160 ka sako sa bugas ang mukabat lang sa walo ngadto sa napulo kaadlaw.
Sa pagkakarun, gitataw ni Mayor Labella nga padayon ang swab testing sa nahisgutang dapit, ingon man contact tracing sa nahimamat sa mga nagpositibo sa COVID-19.
Mihangyo ang mayor nga dili na lang manolisok, walay angayan nga pasanginlan, inay ipadayon lang ang pagpabilin sa tagsa-tagsa ka mga panimalay, ug sundon ang kung unsa may pamalakad sa gobyerno.
Karung adlawa anaa na sa 54 ang ihap sa COVID-19 cases sa dakbayan sa Sugbo diin nadugang niini ang 21 nga ihap sa Barangay Luz, usa Barangay Mambaling ug usa usab sa Barangay Guadalupe.
Ang dakbayan sa Sugbo na ang numero uno sa adunay pinakadaghang kaso sa coronavirus lukop Central Visayas.
