CEBU CITY — Moabot na sa 498 ang mga confirmed cases sa coronavirus disease o COVID-19 sa Central Visayas human nadugangan og laing 40 ka mga kaso gikan sa dakbayan sa Sugbo.
Base sa labing uwahing datos gikan sa Department of Health (DOH)-7, nag-una ang Cebu City diin aduna kini 451 ka mga kaso lakip na ang usa gikan sa Cebu City Jail.
Anaa gihapon sa 28 ang kaso sa Lapu-Lapu City apan nadugangan karong tulo ka mga pasyenteng nagnegatibo sa COVID-19 human gipaubos sa repeat testing.
Samtang wala pay kabag-uhan sa natalang COVID-19 case sa Mandaue City diin anaa pa karon 11.
Wala gihapoy pag-irog sa lalawigan sa Sugbo, Bohol, Negros Oriental, ug Siquijor.
Matud ni DOH-7 Director Dr. Jaime Bernadas nga kadaghanan sa mga bag-ong kaso sa COVID-19 gumikan lang sa mga gipaubos sa contact tracing ug mga nagpacheck-up sa mga clinics.
Mipasalig usab ang ahensya nga padayon kining nakig-alayon sa Bureau of Jail Management and Penology (BJMP)-7 aron daling ma-isolate ug maatiman ang mga pinirisong nagpositibo sa makamatay nga pandemic.
