CEBU CITY — Sikop ang duha ka mga lalaki human nakuhaan og dul-an P29-million nga balor sa ginadiling drugas atol sa usa ka anti-drug operation kagahapon sa Sitio Middle Tabucanal, Brgy. Poblacion Pardo, dakbayan sa Sugbo.
Giila ang mga dinakpan nga silang Jay Paul Arreglado (19-anyos), nagpuyo sa susamang barangay, ug ang kauban nga si Jari Sangcap (18-anyos) ug residente sa Brgy. Cogon Pardo.
Matud sa hepe sa Pardo Police Station nga si Police Major John Kareen Escober nga natultulan sa kapulisan ang ilegal nga transaksyon sa duha human mibutyag ang usa ka drug personality sa dakbayan.
Nasignit sa kapulisan ang mga binultong shabu nga adunay gibug-aton nga kapin 4 kilos ug adunay DDB value nga P28.7-million.
Natanggong sa lock-up cell sa Pardo PNP ang duha ug mag-atubang og kasong ilegal nga pagpayuhot sa ginadiling drugas ubos sa RA 9165.
