CEBU CITY — Nagkasaka na ang confirmed cases sa coronavirus disease o COVID-19 sa dakbayan sa Sugbo ngadto sa 1,280 human nga nadugangan og 191 ka mga bag-ong kaso niini.
Sa report gikan sa Cebu City Health Department, nadugangan og 182 ka mga bag-ong kaso gikan sa Barangay Mambaling.
Ang nahisgutang barangay usab mao ang labing taas nga ihap sa mga natakdan sa coronavirus kung diin anaa na sa 433 ang total confirmed cases niini.
Matud sa report gikan sa Cebu City Public Information Office nga bunga lang sa gipahigayong mass testing ang pagsaka sa mga confirmed cases.
Tungod niini, giplanuhan ni Mambaling Brgy Captain Genes Abellana nga ipa-ubos sa lockdown ang Alaska Mambaling tungod sa pagdaghan sa kaso sa coronavirus disease.
Matod ni Kapitan Genes nga iyang ipa-abot ang maong suhestiyon kang Cebu City Mayor Edgardo Labella sa katuyu-on nga mapugngan ang posibleng pagkuyanap pa sa coronavirus.
Segon pa niini nga mas nakita niya ang sayon nga pagbantay sa panahon nga ma-lockdown ang lugar.
Samtang gipasalig usab sa opisyal nga andam ang barangay sa paghatag og tabang sa mga apektado.
Kung dili matod pa maigo ang funding sa barangay wala matod pa’y angayang kabalak-an sanglit andam usab nga mangayo og tabang ang lokal nga kagamhanan sa dakbayan sa Sugbo.
Samtang, gibutyag ni Abellana nga sa oras nga ma-aprubar ang maong suhestiyon buot niini nga mapa-ubos sa lockdown ang Alaska sa labing daling panahon.
