CEBU CITY — Gihimakak sa usa sa mga covid-19 positive sa Sitio Zapatera, Barrio Luz ang gikatahong na re-swab ang mga pasyente nga anaa sa isolation center sa lugar.
Eksklusibong gibutyag sa School Principal nga si Roy Cameros Generos usa ka COVID-19 positive sa tulumanong Bombo Hanay Bigtime sa Bombo Radyo Cebu nga dili tinu-od nga adunay nare-swab sa ila nga mga nag-positibo sanglit wa gyud matod pa’y taga City Health nga niadto kanila alang sa subling swab test.
Gibutyag niini nga Abril 15 pa sila nakuhaan og swab sample diin sukad adto wa na matod pa masundi og swab or rapid test.
Subay niini, panawagan ni Generos sa lokal nga pangagamhanan sa dakbayan sa Sugbo nga aduna gyuy mapahigayon nga mass testing sa ilang Sitio aron luwas usab matod pa sila nga mobalik sa ilang lugar.
‘Gi-swab test na lagi’
Gibutyag ni Cebu City Administrator Atty. Floro Casas Jr nga subling na-test ang mga taga Sitio Zapatera nga nagpositibo sa coronavirus.
Kini base na usab sa nadawat sa abogado nga report gikan sa City Health Office (CHO).
Gani aduna matod pa’y subling na swab test gahapong adlawa diin gihulat na lang karon ang resulta.
Gibutyag sa City Administrator nga anaa na sa 68 ang nare-swab samtang anaa na sa 18 ka adlaw ang usa ka gatos kapin ka mga nag-positibo nga anaa sa isolation center.
‘Sorry na gud’
Nangayo og pasaylo si Cebu City Vice Mayor Michael Rama sa pipila matod pa ka mga kakuwang nga nahimo sa departamento sa Cebu City government nga nisangpot sa pagtumaw sa pipila ka reklamo sa taga Sitio Zapatera Barrio Luz ning dakbayan sa Sugbo.
Matod sa Bise Mayor nga angayang hapsayon og han-ayon ang unsa mang sayop.
Gipasalig hinu-on sa Bise mayor nga magpadayon ang konseho sa dakbayan sa Sugbo sa paguki og paghimo sa ilang trabaho nga mao ang paghatag og tabang sa katawhan.
