CEBU CITY — Prisuhan ang padulngan sa usa ka incumbent barangay councilor human nituok sa usa ka magtutudlo atol sa Social Amelioration Program (SAP) distribution sa Brgy. Poblacion, dakbayan sa Talisay, Cebu.
Giila ang suspek nga si Konsehal Randy Gavas, 47 anyos; samtang ang biktima mao si Marl Vincent Labitad, 27 anyos.
Matud sa hepe sa Talisay City PNP nga si Police Major Gerard Pelare, nga kalit lang nga gikomprontahan sa konsehal ang magtutudlo nga igo lang kining nagproseso sa SAP distribution.
Natingala na lang ang mga residente human gituok ni Gavas ang liog ni ni Labitad ug nanghulga kini.
Base sa imbestigasyon, gipasanginlan sa konsehal nga gipulitika sa magtutudlo ang ayuda sa gobyerno tungod kay wala malakip sa SAP list ang mga konsituwente.
Nadakpan ang konsehal human ipahigayon ang kapulisan og hot pursuit operation ug mag-atubang og kasong direct assault.
