Gipaluyohan ni Department of Health (DOH)-7 Director Dr. Jaime Bernadas ang baruganan ni Cebu Provincial Governor Gwendolyn Garcia nga walay angayang ikabalaka ang publiko sa epekto sa COVID-19.
Atol sa press conference kagahapon kauban ang gobernadora, mipadayag si Bernadas nga angayang likayan ang makamatay nga pandemic sanglit anaa na mana kini sa komunidad.
Matud ni Bernadas nga mas grabe ang dengue fever ug tuberculosis itandi sa coronavirus disease, kung ang mga numero mismo ang pasultihon.
Dason pa niini nga mas daghang kinabuhi ang nakalas sa nahisgutang mga sakit itandi sa COVID-19 maong dili mabalaka ang publiko.
Moabot na sa 6,000 ang nataptan sa dengue fever sa tibuok rehiyon 7 atol sa unang quarter sa tuig 2020, diin three times ang gidaghanon niini itandi sa kasamtangang COVID-19 cases sa rehiyon.
Nitambag usab si Garcia nga mas maayong pakusgon ang resistensya pinaagi sa mga natural remedies ug bitamina sa lawas ug mosunod sa health protocols.
Kini aron kalikayan ang duha ka mga balatian nga mao ang COVID-19 pandemic ug “fear pandemic.”
