CEBU CITY-Mipadayag si Cebu City Vice Mayor Michael Rama nga adunay mahimo ang City Government aron masulbad ang giingong ‘under-reporting’ sa mga kaso sa COVID-19 sa dakbayan.
Kini ang pamahayag sa bise mayor sa dihang nahinabi sa Bombo Radyo Cebu sa tulumanong Bombohanay Bigtime.
Kini human nga gikumpirmar sa City Health Department nga adunay delay sa reporting sa mga nangamatay sa COVID-19 gumikan kay gi-hold sa mga tambalanan ang death certificate samtang nag-pending pa ang bayronon sa hospital bills.
Matud ni Rama nga nabalaka usab ang mgakadagku-an sa mga tambalanan sa Cebu City sa ilang operasyon gumikan sa giingong kakuwang sa ginansya.
Tungod niini, misalig si Rama nga ilang hatagan og tukmang solusyon pinaagi sa pagtinabangay tali sa mga tambalanan ug sa kagamhanan sa dakbayan.
‘Covid Hour’
Samtang nisugyot ang bise-mayor sa mga sibyaanan sa radyo nga magbaton og “COVID Hour” kung diin hisgutan ang maong pandemya ingon man ang mga lakang gikan sa mga hingtungdang ahensya.
Kini aron masayud ang kinabag-ang publiko kalabot na sa epekto sa COVID-19 sa tanang panahon. |GN
