CEBU CITY — Midangop sa Bombo Radyo Cebu ang usa ka driver sa motor nga dunay food delivery app aron ipaabot ang iyang kasinatian ug makuha ang hustisya sa iyang gidangatan.
Gi-angkon ni Teresito Apurado nga gi-harass kini sa usa ka security officer sa Elizabeth Mall human kini nga gitukmod-tukmod.
Una niini, nag-viral na sa social media ang video diin makita nga gitukmod si Apurado sa naasoy nga security officer.
Pagsaysay pa sa biktima nga niatdong higayona naglinya sila kauban ang sama niya nga driver alang sa paghuwat sa order sa ilang mga customer.
Gikuhaan matud pa og hulagway ni Apurado ang usa ka tindahan nga daghan ang driver nga naglinya aron i-send sa iyang anak para pahibaw-on nga daghan ang naglinya ug sagad niini makansel gyud ang ilang order.
Apan kalit matud pa kini siya nga gisita sa secuirty officer ug gipadelete ang hulagway.
Dugang pa sa reklamante nga wala pa makontento ang naasoy nga security officer ug giguyod pa kini pagawas ug gikuha pa ang iyang pangalan ug sa dihang iyang gipangutana ,nasuko kini.
Boot karon nga makuha sa biktima ang kompletong pangalan sa naasoy nga secuity officer aron nga pormal niya nga mapasakaan og complaint.
Gisuwayan na pagkabot sa Bombo Radyo Cebu ang naasoy nga tindahan para masuta ang identity sa naasoy nga secuirty officer ug padayong abli ang sibyaanan sa ilang habig. (fdp)
