CEBU CITY — Mitanyag ang City Agricultural Department sa dakbayan sa Sugbo og mga programa alang sa mga mag-uuma sa bukirang bahin subay na sa epekto sa COVID-19 pandemic.
Nagkanayon ang City Agricultural Officer nga si Joelito Baclayon nga dako kini og tabang alang sa mga nananom og lagutmon, otanon, ug uban pa sanglit nihinay og dyutay ang halin sa mga inani.
Adunay gi-andam nga Bagsakan Center ang kagamhanan sa may South Road Properties karong Agosto 6 ngadto sa 8 diin diha ibaligya ang inani sa mga mag-uuma.
Samtang ipatuman ang price freeze sa mga baligyang otanon ug uban pa aron mag-uniform ang mga presyo niini.
Mibutyag usab si Baclayon nga magbaton ang dakbayan og post-harvest facility aron ipahimutang ang mga produkto gikan sa kaumahan ug dili malata og dali.
Dugang pa niini nga padayong nakig-alayon ang City Government ngadto sa mga mag-uuma pinaagi sa mobile market diin ibaligya ang mga inaning produkto ngadto sa tagsa-tagsa ka mga kabalayan sa Cebu City.
Padayon usab nga nagkuha og inputs ang City Agricultural Department gikan sa mga mag-uuma sa bukirang mga barangay alang sa paghatag og pagtagad sa ilang mga suliran ubos sa new normal. /gn
